位置: 主页 > F超生活 >【轮证赢家】被困 >
  • 【轮证赢家】被困

    2020-06-13
    【轮证赢家】被困放大图片

    依家9点27分,我喺屋企对住部电脑同源源不绝嘅车龙,真係无办法返到公司,一众将军澳同事都被困,唯有同老细讲「我被困,下昼先返得唔得呀?」,好彩我老细出名好人,佢只係好轻描淡写咁覆咗我一句「No worry, take it easy」虽然呢句说话有啲变态,但我都想同我老细讲句:「我爱你呀!」(而事实佢噚晚仲问我有无事,係咪喺屋企添)。

    恒指正式开市,开市跌27点,报25848点,开恒指日线图见到今日恒指粒烛企返喺保历加通道底(25496点)高少少嘅位置,不过,见SlowSTC(14,3)%K线再度跌穿条%D线。形态上其实係有少少造紧个「圆底」出嚟嘅,不过兜唔兜得返上去,就真係要睇吓个市有无力啦。

    开恒指牛熊证街货图,上方熊证街货最贴价就係26200至26299点,呢度有相当于1207张期指,呢度亦都係重货区,同现价(9点46分mark底25854点计),大市依家要反弹346点先可以上得到呢一层嘅门口,係门口咋喎,唔係食晒喎。

    至于下方牛证最贴价嘅係25600至25699点,有相当于308张期指嘅街货,虽然唔多亦唔係重货区(重货区喺25000至25099点,讲紧都只係得780张期指),但同现价(用返头先mark底嗰口价)比嘅话,若然大市稍后时间向下行多155点嘅话就到。

    但问题嚟啦,上方重货但远,下方近但少货;再加上日线图亦未有明确方向,又係一个两难局面。

    指数无谂头就尝试向个股埋手,上个星期见价残港铁(00066)未有出手,因为实在搵唔到一个好位置,反映咗就算佢价残但无力弹起嘅话,咁真係几残都无用;另一只个价都残残地嘅就係腾讯(00700),320蚊呢个位计埋今日都叫做守咗五日,反映有一定嘅支持,再加上条SlowSTC(14,3)落到十几呢啲超卖位,即使佢可以再超卖落去,但再落嘅空间确实有限,可以将佢放定入个watch list度先。

    作者阿珊,任财经/投资版传媒人十几年,《钟摆战略赢港股》作者。用技术分析专心玩轮证,唔贪心,志在搵餐下午茶。

    电邮:【轮证赢家】被困[email protected];FB:轮证赢家

    放大图片



    上一篇: 下一篇: